Abakada ng Pag-ibig: ELAINE Chapter 1

 

FREE TAGALOG ROMANCE NOVELS

Abakadang Pag-ibig: Alexandra

Abakada ng Pag-ibig: Bianca

Abakada ng Pag-ibig: Catlyn 

Abakada ng Pag-Ibig: Desiree 

 Abakada ng Pag-Ibig: ELAINE

by Maia Jose

Copyright Maria Teresa C. San Diego

All Rights Reserved

 

Published in print by Valentine Romances

Books for Pleasure, Inc.

First printing 1998

ISBN: 971-502-868-3

 

TEASER:

        Kahit kaytagal na niyang iniibig si Arman, nainsulto si Elaine nang balingan siya nito matapos iwan ng dating girlfriend. At ang cynical nang si Arman ay naghahain ng proposal na relasyong walang kinalaman ang pag-ibig.

        Nangako ang maganda at palaban na fitness trainer na ilalampaso ang binata sa kabiguan. Pero bakit habang pinasasakitan niya si Arman ay siya rin ang nasasaktan?

CHAPTER 1

TAHIMIK ang karagatan sa dapithapon. Banayad ang hampas ng alon sa gilid ng luxury cruise ship na Carribean Queen.

        Pauwi na ang luksuryosong barko sa Estados Unidos mula sa isang linggong paglalayag sa Carribean. Nanggaling ito sa mga isla ng San Juan, St. Thomas at Serena Cay sa dakong iyon ng mundo na paboritong pasyalan ng mga maykaya sa buhay. Ikaanim na araw ng biyahe ay nasa gitna ng karagatan ang barko. Bukas ay dadaong ito sa Port of Nassau sa Bahamas. Sa makalawa nama’y makakabalik na sa pinagmulang pier sa Fort Lauderdale, Florida.

        Kung gaano kahinahon ang panahon sa labas ay kabaligtaran naman ang kalagayan sa loob ng maluwang na gym ng cruise ship. Malakas at bumabayo ang musikang kaindak-indak. Itinataas ang energy level ng mga nagsisipag-ehersisyo.

        “And four... and three... and two... and one...” masiglang bilang ng maganda at seksing fitness trainer na namumuno sa klase.

        Naka-two piece workout outfit siya. Lavender at fuschia na sports bra at gym shorts. May katernong baby pink na sports socks at kumbinasyong itim at fuschia na cross-trainer shoes. Naka-ponytail na mataas ang mahabang buhok.

        Si Elaine ang fitness trainer na iyon. Pinay. Kahit na sino ay maeengganyo ngang magbigay nang todo sa pag-eehersisyo makahabol man lang nang kahit kaunti sa kanyang kaseksihan.

        Step aerobics ang kasalukuyang pinagpapawisan ng klase sa air-conditioned gym na may halos tatlong pulgadang kapal ng carpet. Ang mga nag-eehersisyo – na panay babae, mula teener hanggang matrona – ay akyat-baba sa kanya-kanyang plastic na bangkong tuntungan na anim na pulgada ang taas. Sumasabay sa mabilis na indak ng musika.

        Unti-unting nagbago ang tugtog. Bumagal ang beat.

        “We’re starting to cool down, ladies,” paalala ni Elaine. “Slower now...”

        Tuloy pa rin ang pag-akyat-baba ng lahat pero mas mabagal na.

        Bumagal pang lalo ang tugtog.

        “Feet together now and stretch up your arms,” sabi ni Elaine. “On your toes... up... and down... and up... and down... now sway your hips... to the right... to the left... and all the way around.. doesn’t this make you feel sexy?”

        “Oh yes!” malakas na sagot ng mga nangakangiting miyembro ng klase.

        “And once again... sway to the right... to the left. And all the way around...” pagpapatuloy ng dalaga.

        Lalo ngang tumingkad ang kaseksihan ni Elaine sa mala-belly dance na paggalaw.

        “Now for our finale... reach up high... and to the sides... bend low to the floor... touch your toes... and slowly... slowly come back up... and smile! Yes! Thank you, ladies. That was very well done,” pagtatapos ng dalaga.

        Nagpalakpakan ang mga miyembro ng klase bago sabay-sabay na nagtungo sa shower rooms.

        Bumaling naman si Elaine sa sound system. Pinalitan niya ang nakasalang na tape. Mas mabilis nang di hamak kaysa kanina ang beat.

        Bumalik ang dalaga sa kanyang puwesto at sinabayan ng mabilis na step aerobics ang musika. Akyat. Baba. Akyat. Baba. Sumusuntok sa ere ang kanyang mga kamao. Bigay-todo. Parang may hinahabol.

        Tumatagaktak ang kanyang pawis. Nakakunot ang kanyang noo. Buung-buo ang kanyang konsentrasyon sa ginagawa.

        Bumukas ang pinto ng gym.

        “Elaine!” tawag ng papasok na si Gretchen, isa ring fitness trainer.

        “Katatapos lang ng klase mo, a,” sabi pa nito habang papalapit sa kanya. “Bakit ba nagpapakamatay ka pa riyan?”

        Hindi sumagot si Elaine. Ni hindi niya pinansin ang matalik na kaibigan.

        “Alam ko, ibinubunton mo lang diyan ang sama ng loob mo kay Arman,” pagpapatuloy ni Gretchen. “Sayang, may maganda pa naman akong ibabalita sa iyo. Nakausap daw ni Gerry si Arman sa phone kagabi, e. As I’m sure you know, he’s back from his Manila vacation. Nasa Fort Lauderdale na uli siya.”

        Biglang huminto si Elaine sa pag-eehersisyo.

        “O, ano ka ba?” saway naman ni Gretchen. “Totodo ka nang ganoon, pagkatapos bibiglain mo ang katawan mo sa paghinto. Para kang hindi trainer, a.”

        “Huwag mo na akong ibitin, Gretch,” sagot ng humihingal na dalaga. “Ano’ng balita tungkol kay Arman?”

        Ngumiti nang pagkaliwa-liwanag si Gretchen.

        “The wedding is off,” sagot nito. “For good. Nag-break sila no’ng dati niyang girlfriend sa Manila. In fact, ikakasal na raw sa iba ‘yung girl. O, masaya ka na?”

        Natulala si Elaine.

        Natawa naman si Gretchen.

        “It’s too good to be true, ano?” sabi nito. “But believe me, hindi ako nagsisinungaling. Si Arman mismo ang nagkuwento kay Gerry.”

        Napakurap-kurap si Elaine.

        “Then he must be devastated,” halos pabulong na sambit niya. “Kawawa naman siya, Gretch.”

        “Ano?” kunot-noong sagot ng kaibigan. “Akala ko pa naman, matutuwa ka.”

        “W-well, s-siyempre,” pakibit-balikat na amin ni Elaine. “Para akong naalisan ng mabigat na batong nakadagan sa dibdib. Pero... pero naaawa rin ako sa kanya. He must be hurting.”

        “Then now is the time to go to his rescue,” nakangiting sabi ni Gretchen. “It’s perfect. Habang heartbroken siya, you’ll be his nurse and his angel.”

        “Paano ko naman gagawin ‘yon, e, ang ilap-ilap niya sa akin?” malungkot na sagot ng dalaga.

        “Noon iyon,” katwiran ni Gretchen. “May girlfriend kasi siya noon. Siguro, talagang umiiwas siya na magkagusto sa iyo. Ikaw ba naman? Napaka-irresistible mo sa men. Natakot siguro si Arman. Alam mo naman napaka-good boy ng lalaking iyon. Ayun, sa sobrang pagka-faithful niya roon sa dati niyang girlfriend, ganoon lang pala ang mangyayari sa kanila. Siguro naman, mas maa-appreciate ka na niya ngayon.”

        Napabuntonghininga si Elaine.

        “Nalilito ako, Gretch,” amin niya. “Natutuwa ako na nalulungkot sa pangyayari. Nag-aalala rin ako sa kanya. Hindi ko maintindihan.”

        “Hay naku, in love ka nga,” iling ng kaibigan. “Kaya ayoko nang ma-in love, e. Nakakabaliw talaga. Mas gusto ko na lang na makipag-fling. Panay enjoy lang. Hindi naho-hostage ang puso ko. Hindi natuturete ang utak ko.”

        “Hindi ko naman ginustong magkagusto sa kanya, a,” sagot ni Elaine. “Ewan ko nga ba. Ang tanga-tanga talaga nitong puso ko. Bakit sa kanya pa na-in love.”

        “Mabuti’t inaamin mo,” sagot ni Gretchen. “Sa bawat biyahe naman natin, may nakikilala ka’t nanliligaw sa iyo na mga good catch. Kung bakit diyan ka lang kay Arman obsessed na obsessed. Pero wala ka na ngang dapat problemahin ngayon dahil biglang unattached na uli siya. So grab your chance, girl. Do your best.”

        “I just want to help him, Gretch,” sagot niya. “Gusto ko lang na mabawasan ang anumang nararamdaman niyang sakit ngayon.”

        “No problem,” sabi ng kaibigan. “Habang tinutulungan mo siya’y tinutulungan mo rin ang sarili mo. It’s going to be a win-win situation. Walang talo. Pareho kayong panalo.”

 

PERO hindi pa rin napanatag ang loob ni Elaine.

        Habang nakatapat siya sa mainit na shower ay binabalikan niya ang lahat ng namagitan sa kanila ni Arman.

        Magtatatlong taon na silang magkasama sa pagtatrabaho sa Carribean Queen. Nobenta porsiyento kasi ng crew at staff ng naturang barko ay mga Pilipino. Food and beverage manager dito ang binata.

        Magkasama rin sila sa apartment building na tinitirhan ng karamihan ng mga Pilipinong nagtatrabaho sa Carribean Queen. Nasa pangatlong palapag ng gusali ang unit ni Arman. Nasa pangalawang palapag naman ang unit nila ni Gretchen, tig-isa. Kasama rin nila sa gusaling iyon si Gerry na casino manager ng barko.

        Matalik na kaibigan ni Arman si Gerry, na ka-affair naman ni Gretchen. On and off ang relasyon ng dalawa palibhasa’y magkapareho ng pagtingin sa pag-ibig. Ayaw magpatali. Walang commitment. Okay lang na makipag-date sa iba. Pero kapag magkasama ay laging masaya.

        Kung naging ganoon lang sana kababaw ang kaligayahan niya, buntonghininga ni Elaine. Walang mga komplikasyon.

        Bakit naman kasi natuto pa siyang umibig. Sa kauna-unahang pagkakataon pa man din. At sa isang tao pang may pananagutan na sa iba.

        Nang makilala niya si Arman ay nalaman na niyang may girlfriend itong naghihintay sa Pilipinas. Pero hindi pa rin niya napigil ang puso niya. Na-in love pa rin siya sa binata.

        Kung tutuusin, mahirap unawain kung bakit. Matanda sa kanya si Arman nang anim na taon. At lutang na lutang ang mga pagkakaiba nila sa isa’t isa. Konserbatibo kasi ang binata. Palaging seryoso. Tahimik. Samantalang siya ay laging up-to-date sa mga bagong trends sa fashion, sa fitness, at sa lahat ng bagay. Masayahin siya. Outgoing.

        Hindi rin naman kaguwapuhan si Arman. Ang sabi nga ni Gretchen ay hindi sila bagay. Lugi raw siya. Marami raw namang nanliligaw sa kanya na kayguguwapo at pang-competition ang maskuladong pangangatawan.

        Pero gaano man kaguwapo o kakisig ang lalaking kaharap niya ay hindi naman siya nakadarama  ng atraksiyon na tulad ng nadarama niya sa matiim na titig ng mga mata ni Arman. At kahit hindi pang-body builder ang katawan ng binata ay inaasam pa rin niyang makulong sa mga bisig nito at humimlay sa dibdib nito.

        Tama ang terminong ginamit ni Gretchen. Obsessed na nga yata siya kay Arman.

        Noong bago nga umalis ang binata patungong Pilipinas ay may nagawa siyang bagay na hindi niya akalaing kaya niyang gawin.

        Alam kasi niya na ang pag-uwing iyon ni Arman ay para mag-ayos na ng pagpapakasal sa naghihintay nitong girlfriend sa Pilipinas. Kaya naman naging parang desperada na siya.

        Noong umagang paalis na ang binata ay bigla na lamang siyang sumipot sa apartment nito – nagprisintang ihahatid ito sa airport sa kotse niya. Alam din kasi niyang iiwan nito ang sariling kotse sa basement garage ng kanilang apartment building. Mas praktikal na mag-taxi na lang patungong airport.

        Pero may tinawag na palang taxi si Arman.

        Halata niyang ilang na ilang si Arman sa kanya. Noong dadalawa nga lang sila sa elevator na pababa sa lobby ay halos dumikit  ito sa kabilang dingding, mapalayo lang sa kanya. Lalo naman siyang naging determinadong maipakita rito ang kanyang damdamin kahit na sa huling pagkakataon.

        Kaya bago sumakay si Arman ng taxi ay bigla niya itong niyakap at hinagkan – sa mga labi.

        Pareho silang nagulat. Ang una kasi niyang intensiyon ay hagkan lang ito sa pisngi. Huling paalam. Pero nang gagawin na niya’y parang nagkaroon ng sariling kusa ang kanyang mga labi. Parang may kung anong puwersang nagtulak sa kanya patungo sa mga labi ng binata.

        Naglakas-loob siya – wala naman siyang alam sa paghalik. Wala naman siyang nagawa kundi idikit ang kanyang mga labi sa mga labi ni Arman. At sansaglit lang. Naduwag din siya’t kusang umatras.

        Pagkatapos ay hindi na niya alam ang susunod niyang gagawin. Parang hindi na nga siya makatingin nang diretso kay Arman. Nataranta siya sa mga nadama niyang emosyon mula sa sasandaling pagdidikit ng kanilang mga labi.

        Mabuti na lang at biglang dumating si Gerry. Nabasag ang tensiyon. Nagkaroon siya ng pagkakataong makabawi ng kanyang balanse. Magpanggap na cool na cool pa rin. Parang walang anumang nangyari.

        Pero ang totoo’y hindi na niya malilimot kailanman ang kanyang nadama sa sansaglit na halik na iyon. Ang kauna-unahang halik niya.

        Si Arman ay nagpatay-malisya lang din. Pero sa pagkakakilala niya sa binata ay alam niyang imposibleng maging ganoon lang kabalewala rito ang kanyang kapangahasan.

        At ngayo’y mas komplikado na pala ang sitwasyon.

        Noon kasi, ang buong akala niya’y pagpapaalam na niya kay Arman ang halik na iyon. Sa pagbabalik nito’y magiging formally engaged na ito sa dating katipan, kung hindi pa man nakasal na. At kailangan na niyang itigil nang ganap ang pagpapakita o pagpapadama rito ng kanyang pagmamahal.

        Sa kabila kasi ng kanyang pagiging makabago sa lahat ng bagay ay sagrado ang tingin niya sa kasal. Hindi niya magagawang maging sanhi ng pagkasira ng relasyon ng mag-asawa.

        Noong simpleng girlfriend pa lang ang naiwan ni Arman sa Pilipinas ay hindi pa siya nagi-guilty sa kanyang nadarama. Ang katwiran niya, all is fair in love. Hangga’t hindi pa kasal o formally engaged man lang ang dalawa ay maaari pang magbago ng isip ang bawat isa. May laban pa siya. At wala naman siyang ginawa para hayagang akitin si Arman, liban doon sa ginawa niya sa pag-alis nito.

        Ibang usapan na kasi pag ikinasal na si Arman. Pati ang itinatago niyang damdamin ay kailangan na niyang supilin.

        Kaya naging desperada siya. Nagbakasakali na kapag naramdaman ni Arman ang feelings niya ay magbago ang isip nito sa huling sandali. Wishful thinking.

        At syempre pa, walang nangyari. Napahiya lang siya. Kaya nitong mga nakaraang araw na wala si Arman ay ibinunton na lamang niya sa puspusang pag-eehersisyo ang kanyang pagdurusa.

        Ngayon, bigla niyang malalamang sa pagbabalik ni Arman ay ganap na pala itong malaya.

        Ano na kaya ang iniisip nito tungkol sa kanya? Tungkol sa ginawa niyang paghalik dito?

        Paano niya ngayon haharapin si Arman? Nahihiya siya sa ginawa niya.

        Saka lang napansin ni Elaine na nagsisimula nang mangulubot ang kanyang balat sa pagkababad sa ilalim ng shower. Dali-dali na niyang tinapos ang pagpaligo.

 (Kapag hindi lumabas ang kasunod na chapter pagkatapos nito, pindutin ang > o kaya’y ang Mga Lumang Mga Post na link.)

(Link sa listahan ng iba pang mga nobela.)