FREE TAGALOG ROMANCE NOVELS
“GIRLS, I’m
getting married!” pahayag ni Desiree.
Siya ang nangumbida kina Alexandra,
Bianca at Catlyn sa pagkikitang ito. Talagang mag-aanunsiyo siya.
Pero hiniling ni Catlyn na doon na sila
magkita-kita sa bagong bahay nito at ni Jake sa Project 6. Mahirap pa kasi
nitong iwan ang dadalawang buwang anak na si Jack.
Pumayag naman si Alex. Puwede kasi nitong iwan ang mahigit pitong
buwang anak na si Alyssandra sa mga lolo’t lola na sa Project 6 din nakatira.
Sina
Bianca ay naglalagi rin naman sa bahay ng daddy niya sa Project 6 kahit na may
bahay na ito at si Paolo sa Tagaytay. Habang buntis ang babae ay mas gusto ni
Paolo na laging malapit sila sa ospital. Lalo pa ngayong mahigit pitong buwan
na ang dinadala ni Bee.
Walang ipinakitang anumang pagkagulat
ang tatlo sa inianunsiyo ni Desiree.
“O, kailan na nga ba?” tanong ni Alex.
“Next month,” sagot ni Des. “Pero hindi
kay Arman. Kay Brad.”
Saka lang rumehistro sa mukha ng tatlo
niyang kaibigan ang inaasahan niyang pagka-shock.
“Brad?” parang wala sa sariling ulit ni
Bianca.
Mula nang magdalantao ito’y parang
laging wala sa sarili. Lagi kasing nangangarap tungkol sa baby na darating na
sa loob ng dalawang buwan.
“Iyong best buddy mo sa trabaho na dati
mong kaklase?” tanong naman ni Catlyn.
“Mabuti’t may nakakaalala pa sa kanya,”
may himig pagtatampo nang sagot ni Desiree. “Para namang hindi ko siya naikukuwento
sa inyo since college. Kilalang-kilala na ninyo si Brad, a.”
“But we’ve never met him,” pagtatanggol
ni Alex sa grupo.
“You will,” nakangiting sagot niya.
“Susunduin niya ako rito mamaya, e.”
“Mamaya?” natatarantang sabi ni Bianca.
“Teka, bago mo siya iharap sa amin, magpaliwanag ka muna. Pati baby ko,
nagugulat sa iyo, e. Ano’ng nangyari sa inyo ni Arman? Bakit biglang dito ka
kay Brad pakakasal? Si Arman ang boyfriend mo, a.”
“Noon,” sagot niya. “Si Brad na ngayon.”
“Kailan pa?” tanong ni Catlyn.
“Noong makalawa lang,” amin niya.
“E, bakeeet?” nakataas ang mga kilay na tanong
ni Bianca.
“Nakipag-break na ako kay Arman dahil
na-realize ko na hindi ko pala siya mahal at hindi rin niya ako mahal,”
simpleng sagot ni Desiree. “All those years, he was in love with an image
samantalang nagbabago na ako. Ako rin, akala ko, mahal ko siya. Noong kaharap
ko na siya, hindi pala siya mahal ng bagong ako. I was just in love with the
idea of love.”
“Kaya bumaling ka rito kay Brad,” iling
ni Alex. “Des, baka rebound lang iyan. O baka naman iniisip mo lang na
inaasahan naming lahat na pakakasal ka na kaya kailangang kumuha ka ng
replacement para sa groom. Hindi naman ganoon, e. Naiintindihan naman namin.
Hayaan mo na iyong mga sasabihin ng ibang tao na makikitid ang isip.”
“Oo nga,” sang-ayon ni Catlyn. “Mabuti’t
tinapos mo ang relasyon ninyo ni Arman nang ma-realize mong hindi na kayo in
love sa isa’t isa. That was a very brave thing to do. So, ituluy-tuloy mo na
ang katapangan mo. Huwag ka nang maghanap ng panakip-butas. Kawawa rin naman
si Brad.”
Tumawa si Desiree.
“No, hindi ganoon. You don’t understand.
Na-realize ko nga na talagang hindi na kami puwede ni Arman noong halikan ako
ni Brad.”
“Hinalikan ka ni Brad?” namimilog ang mga matang sabi ni
Bianca. “Noong hindi pa kayo break ni Arman?”
“Para lang patunayan sa akin na hindi
siya gay,” paliwanag ni Desiree.
“Pinagdududahan mo siyang gay?”
pasinghap na sambit ni Catlyn. “E, bakit pakakasal ka sa kanya?”
“Noon pa iyong pagdududa kong iyon,”
mabilis na paglilinaw ni Desiree. “Bago niya ako hinalikan.”
“Napatunayan mo sa isang halik lang na
hindi siya gay?” kunot-noong tanong ni Alex.
Tumango si Des.
“Ay!” sambit ni Alex, sabay ngiti. “Ibang
klase!”
“At biglang ayaw mo na kay Arman?”
nangingiti na ring tanong ni Catlyn.
“Hindi naman. Akala ko kasi, kapag hinalikan
ako ni Arman, ganoon din ang mararamdaman ko. O higit pa roon,” pagkukuwento ni
Desiree. “So after akong halikan ni Brad,
nagpahalik din ako kay Arman.”
“Mas nauna ka pang mahalikan ni Brad
kaysa ni Arman?” pagtataka ni Bianca. “Aba’y si Arman nga ang may problema.”
“Malaki rin ang naging problema ko,” tumatawang
sagot ni Desiree. “Noong halikan ako ni
Brad, para akong naengkanto. Pero noong halikan ako ni Arman, wala akong
naramdaman.”
“Malinaw na si Brad nga ang love mo,”
sabi ni Alex.
Na tinanguan naman nina Bianca at
Catlyn.
“Pero naguluhan ako kaya pagkatapos kong
makipagkalas kay Arman, pinuntahan ko si Brad sa bahay niya,” pagkukuwento pa
ni Desiree. “Kailangan kong malaman kung bakit ganoon ang nangyari noong hagkan
niya ako. So I asked him to kiss me again.”
Napamulagat ang mga kaibigan niya.
“And...?” tanong ni Catlyn.
“And it was even better than the first
time!” pahayag ni Desiree nang nakangiti.
“Aaaay!” sabay-sabay na tili ng tatlo.
“And we couldn’t stop...” pagpapatuloy
pa ni Desiree. “I didn’t want him to stop.”
“Loka, hindi ko gusto iyong ngiti mo,”
may pagdududang sabi ni Alex. “Parang alam ko ang ganyang feeling.”
“You mean...?” tanong ni Catlyn.
Tumango si Desiree.
“All the way,” amin niyang nakangiti
nang may kapilyahan. “Round trip pa nga, e.”
Nagtilihan uli sina Alexandra, Bianca at
Catlyn. Mabuti na lang at hindi nagising ang nahihimbing na si Jack na naroon
lang sa kunang nasa isang tabi.
“S-sorry...” sabi na lang ni
Desiree. “We got carried away.”
MAS nahirapan
si Desiree na magpaliwanag sa kanyang pamilya.
“Sinasabi ko na nga ba’t hindi maganda
ang kalalabasan niyang may nobyo ka na’y nakikipagmabutihan ka pa sa ibang
lalaki,” sabi ni Walter. “Noon pa kita dapat na pinagbawalang makipagkaibigan diyan
sa Brad na iyan.”
Na sinegundahan naman ni Winston na
hinayang na hinayang na hindi magiging bayaw ang dating kaibigan.
“Kausapin na lang ho ninyo si Arman,”
sagot ng dalaga. “Willing naman siyang magpaliwanag din sa inyo kung hindi kayo
kumbinsido sa paliwanag ko. Nandoon pa rin siya sa apartelle hanggang Lunes.
Martes ang flight niya pabalik sa States.”
“Talagang kakausapin namin siya,” sabi
ni Walter. “Ayokong isipin niyang walang isang salita ang pamilyang ito. Labas
kami sa anumang kalokohan mo.”
“Nakakahiya sa mga kamag-anak nating
nakakaalam na ikakasal ka na kay Arman,” sabi naman ni Delia.
Pero hindi na ininda ni Desiree ang mga
komentaryo ng mga magulang at kapatid. Sapat na sa kanya na maipaliwanag sa
kanila ang buong katotohanan at maipahayag ang mga plano nila ni Brad tungkol
sa kanilang kasal.
Walang anumang makapagpapalabnaw sa
labis niyang kaligayahan.
SA UP chapel
napiling magpakasal nina Desiree at Brad. May espesyal na kahalagahan sa
kanilang dalawa ang campus na iyon kung saan unang nabuo at pagkatapos ay pinagtibay
ng panahon ang kanilang ugnayang nagsimula sa malalim na pagkakaibigan.
Pero tulad ng ginawa ng mga kaibigang
naunang ikinasal ay sa New Haven Spa Hotel sa Makati rin nila ginanap ang
reception, kahit pa napakalayo niyon sa UP. Parang naging tradisyon na kasi
iyon ng grupo na ayaw sirain ni Desiree. At siyempre, nakakakuha sila ng
malaking discount sa pamamagitan ng image model ng hotel na si Alexandra at sa
advertising art director na si Edric.
Maayos namang nairaos ang kasalan. Kahit
paano’y nakisama rin ang pamilya ng bride. Nahiyakat nina Deborah, Diva, William
at Neneth sina Walter, Delia at Winston na magpakatao para sa okasyon.
At napunuan ng kasiyahan ng pamilya ni
Brad – na nagsidating lahat mula sa Estados Unidos – ang anumang kakulangan
mula sa kabilang partido. Giliw na giliw ang mga ito kay Desiree.
“We’ve been hearing so much about you
all these years,” pagtatapat ng Mama ni Brad sa bagong daughter-in-law. “We’re so
glad that our prayers for his happiness were finally answered.”
“So were my prayers,” nangingislap ang
mga matang sagot ng bride.
SA New Haven
din ang honeymoon ng mga bagong kasal.
Pero may bago nang package ang hotel. At
iyon ang agad na inialok kina Desiree at Brad nang malamang kabarkada sila nina
Alexandra, Bianca at Catlyn. Wala nang kasamang tour sa package. Isang linggong
paglalagi na lamang sa Honeymoon Suite ng New Haven sa Makati.
“Alam mo ba kung bakit nabuo ang bagong
package na ito?” pagkukuwento ni Desiree kay Brad noong inaayos pa lang nila
ang reservations para sa kanilang honeymoon. “Kasalanan ito ng mga luka-luka
kong kaibigan. Paano ba naman, hindi na nakapag-avail ng scheduled tour na kasama
sa original package. Noong makapasok sa Honeymoon Suite, ayaw nang lumabas.
Ayaw nang mag-tour.”
“Oo nga naman,” tumatawang sagot ni
Brad. “Bakit ba magpapakalayu-layo pa? Narito na ang paraiso, e. Dito na rin tayo sa bagong package.”
At sa mismong honeymoon nila,
pinatunayan nga nina Desiree at Brad sa management ng hotel na tama lang ang
naging desisyong magbuo ng bagong newly-weds’ package – na sa kanila’y
na-extend nga lang nang hanggang dalawang linggo.
WAKAS
May sariling mga kuwento ng pag-ibig sina Alexandra,
Bianca, at Catlyn.
Basahin and kwento ng pag-ibig ni Arman sa
(Kapag hindi lumabas ang kasunod na chapter pagkatapos nito,
pindutin ang > o kaya’y ang Mga Lumang Mga Post na link.)
