FREE TAGALOG ROMANCE NOVELS
EKSAKTONG
natapos ang kontrata ni Jake kay Greg Garchitorena ay idinaos naman ang kasal
nina Jake at Catlyn.
Ang pondo ay nagmula sa unang malakihang benta ng magkatuwang na magkatipan. May nakuha kasing contact si Catlyn na manufacturer ng mga industrial security devices sa Germany. Sa tulong ng rekomendasyon ni Greg ay nailapit nila ni Jake ang mga produkto sa iba pang mga industriyalista. At dahil maalam si Jake sa mga pasikut-sikot kaugnay ng seguridad, tatlong deal agad ang kanilang naisara. Kahit malaki ang kinita ng magkatipan, napagkasunduan nilang gawing simple lang ang kasalan. Hindi magarbo.
Ginawa ang reception sa pinakamaliit na
function room ng New Haven Spa Hotel sa Makati. Kaunti lang kasi ang bisita,
mga pinakamalapit lang na kamag-anak at kaibigan. Ang groom ay ni wala namang
kaanak sa Maynila.
Ninong sina Greg Garchitorena, Gen.
Dario at Lt. Samson.
Espesyal na bisita sina Garci, Santi,
BenHur at CR.
Hindi siyempre nawawala ang barkada ni
Catlyn – ang mag-asawang Alexandra’t Edric, ang mag-asawang Bianca’t Paolo, at
si Desiree na siyang maid of honor.
“Sinasabi ko na nga ba,” himutok ni Des
bago nagsimula ang martsa sa simbahan. “Ako nga ang unang nagka-boyfriend sa
ating apat pero heto ako, ako pa ang naiwang dalaga.”
“Pikutin mo na kasi si Arman pag-uwi
niya rito,” biro ni Alex.
“O kaya’y maghanap ka na ng iba,” sabi
naman ni Bee.
“Baka nga matandang dalaga ang kalabasan
ko nito, e,” disgustadong sagot ni Desiree. “Hmp, nakakainis talaga!”
“Hayaan mo, Des, sa iyo ko ihahagis ang
bouquet,” pangako ni Catlyn. “Basta siguraduhin mo lang na masasalo mo, ha?”
PATAPOS na ang
reception nang malaman ni Catlyn na sa honeymoon suite na rin ng New Haven nila
idaraos ang kanilang unang tatlong gabi bilang mag-asawa.
“Akala ko ba, magtu-tour tayo?”
nagtatakang tanong niya kay Jake.
Ang alam kasi niya ay isang gabi lang
sila roon. Pagkatapos, tig-isang gabi rin sila sa iba’t ibang sangay ng New
Haven Spa Hotel sa bansa.
“May ibinulong sa akin si Paolo, e,”
nakangiting sagot ni Jake. “Alam mo naman iyong nangyari sa honeymoon nila,
hindi ba? Siguradong maiiwan din daw tayo ng tourist bus kung bukas natin
sisimulan ang tour. Kaya pina-postpone ko.”
Natawa na rin si Catlyn.
“Natatandaan ko nga ang kuwentong iyon,” sabi niya. “Pero
bakit kailangang tatlong gabi pa tayo rito? Ang tagal naman.”
“Huwag kang mag-alala, sinisiguro ko sa
iyong hindi ka maiinip,” kumikindat na sagot ni Jake. “At sinisiguro ko rin sa
iyo na tatlong umaga tayong tatanghaliin ng gising. Aba, ang dami mo yatang
pagbabayaran sa akin. Natatandaan mo ba iyong ginawa mong kapilyahan sa sapa sa
bundok? Alam mo bang hindi ako nakatulog magmula nang ipagtapat mo iyon sa
akin?”
Napabungisngis ang bride.
“Ikaw naman kasi, e,” panunukso pa niya.
“Hindi ko akalaing makapagtitiis ka nang mahigit dalawang buwan. Masyado kang
good boy kahit engaged na tayo. Hindi man lang kita na-seduce. Hindi rin ako
mapagkatulog, a, baka akala mo.”
Naningkit ang mga mata ni Jake sa
pagkapikon.
“A, ganoon ha?” sagot nito.
“Katakut-takot na pagpipigil na nga ang ginawa ko sa laki ng hiya ko kina Mommy
at Daddy, kakantiyawan mo pa ako nang ganyan? Humanda ka mamaya...”
PAGDATING ng
bagong kasal sa kanilang honeymoon suite, tinupad nga ni Jake ang ipinangako
nito.
Alas-singko ng umaga sa ikaapat na araw
ng honeymoon, tumunog ang alarm clock.
“Sweet...” bulong ni Jake sa may tainga
ng asawa. “Alarm clock na yata iyon.”
“Hmmm,” padaing na sagot ni Catlyn.
“Pakipatay,” bulong ni Jake.
Abala kasi ang dalawang kamay nitong
gumagala sa katawan ng kabiyak.
Kinapa ni Catlyn ng isang kamay ang
alarm clock na nasa side table. Ilang beses pang tumigil ang kanyang kamay para
mangunyapit sa kubrekama, kasabay ng singhap at daing, bago niya nagawang
patayin ang alarm.
“Cat...” bulong uli ni Jake kapagdaka.
“Alas-sais ang alis ng bus.”
“Mmm,” sagot ni Catlyn na parang wala sa
sarili.
Naririnig niya ang sinasabi ng asawa
pero wala na siyang pakialam sa bus na iyon.
“Paano ito?” tanong ni Jake sa pagitan
ng pag-ulan ng halik sa kanyang leeg, pababa sa kanyang dibdib.
“Love... huwag na kaya... huwag na kaya
tayong... mag-tour,” pasinghap-singhap na bulalas ni Catlyn.
“Okay,” malambing na sagot ni Jake bago
dumausdos pang lalo na pababa ang mga labi nito.
“Jake...” daing ni Catlyn. “Jake,
tawagan mo muna ang... front desk.”
“Mamaya na,” sagot ni Jake.
“Pagkatapos...”
WAKAS
May sariling mga kuwento ng pag-ibig sina Alexandra,
Bianca, at Desiree.
Basahin ang kwento ng pag-ibig
ng heredera ng mga Garchitorena sa
(Kapag hindi lumabas ang kasunod na chapter pagkatapos nito,
pindutin ang > o kaya’y ang Mga Lumang Mga Post na link.)
